鼎家喜筷 (Closed)

荃灣真係吃喝玩樂包羅萬有 荃灣西行完如心、荃灣廣場，又可以去埋海之戀，行完Donki無晒力，勁想食啲好飽肚嘅嘢補充力氣，加上天氣凍最啱打邊爐同食熱辣辣嘅雞煲。於是我哋就揀咗食🤭🤭鼎家喜筷，呢度嘅特色就係可以任添嘅雞煲同任添嘅下火嘅嘢飲，送蔬菜拼盤，唔怕熱氣食得盡興🤭🤭呢度嘅雞煲相當唔錯，啲雞件件都好厚肉，雞味濃郁，新鮮雞嘅味道，真材實料☺️我哋嗌咗小辣，椒辣食到好爽。一路辣一路飲凍飲解渴消辣，嘢飲任添，唔使就住就住飲。食完雞煲就可以加湯打邊爐，打邊爐最緊要有嘅配料佢哋都有得嗌，拼盤有娃娃菜，金針菇、菇等等，居然仲有女友至愛嘅粟米🌽打邊爐唔少得烏冬同午餐肉😋😋仲特別嗌咗珊瑚蚌，爽口彈牙有鮮味，使珊瑚蚌好花功夫，但佢哋洗得好乾淨，我哋都好放心咁食。呢度嘅裝修明亮，天花仲有鼎爺樣嘅彩色燈，夠晒有新意，位與位之間又唔逼夾，坐得好自在。 佢哋仲有個飲品甜品攤擋 打完邊爐可以開第二個胃食甜品🤣🤣好啱同朋友聚會 可以一次過食埋甜品😂😂