陶源酒家 (Closed)

12月食大閘蟹已是尾水，基本上都唔期望會有爆膏嘅蟹喇，叫做盡最後努力食埋今年最後一次，跟住就疊埋心水等出年先再有得食了。一開始食頭兩隻係好失望，蟹可能唔太新鮮就死就死，食落無蟹味兼且仲水水地（蟹一死肉就會化水跟住發臭），諗住食多兩隻就收手。點知第三隻開始個質素又响返度喎，有膏、甘香肥美。所以食蟹有時都好睇彩數，就算同一批蟹，每一隻嘅個別質素都可以唔同。好彩之後食嘅全部都正常，終於發揮後勁食咗好多。今餐全部係蟹公。油鹽焗嘅好好味，但始終油咗啲唔可以食太多。值得一讚套餐包嘅其他嘢食都好味，壽包好大個建議要share食，奶豬皮脆肉嫩，抵讚。