BTB - Better Than Burger (富多來商場第二期) (Closed)

星期日朝早同人夫去完屯門飲茶，下午決定去大角咀覓食。最後搵到呢間隱藏於橫街既burger店。呢間burger店係新九龍廣場對面街，周圍都係舊樓。舖面面積較細，得幾個單邊位。我哋就揀咗坐係店外長櫈。我哋叫咗「手打牛肉冬甩漢堡」和「軟殼蟹冬甩漢堡」，其中一個轉咗套餐，可以試埋薯條。等咗10分鐘左右就有得。手打牛肉漢堡肉質鮮嫩多汁，而軟殼蟹漢堡炸得好酥脆。呢間舖既burger都係用冬甩包做包面，口感非常鬆軟。入面配料有蕃茄、芝士、生菜。套餐跟薯條同汽水，我哋揀咗BBQ味炸薯條。薯條口感外脆內軟，燒烤味道十分濃郁，好食到停唔到口。我哋order咗正常size，如果想食少啲或者係細胃人士，可以叫「二人拼盤」或者「迷你漢堡下午茶」套餐。另外仲有為素食者而設既「大啡菇漢堡」。呢度仲可加topping係包面，有珍珠、棉花糖、煙肉三款比你揀。人夫都話呢間舖可以encore，非常推薦大家去食。