阿爺燒鵝餐室

Open Now

Now Closed

是日冬至，一家人食飯加餸，當然要斬料啦！一直都好想試位於大圍呢間「阿爺燒鵝餐室」，今日終於有機會啦！飛天頭抽雞：呢度只有半隻雞，但係估唔到望落都有成隻雞咁多啊，返到屋企時打開盒，真係滿分驚喜！頭抽雞嘅烹調時間得宜，肉嫩滑之餘皮又夠爽，相當入味，肥膏都唔算多。霹靂火燒腩：師傅將發泡膠盒一個切口，等燒腩可以疏氣，喺回家期間豬皮都仍然可以保持甘香可口。燒腩仔皮脆肉嫩，一層皮，一層肥肉一層瘦肉，食落去一啲都唔鞋身，帶有點點鹹香，仲有保留少少油香同埋豬香味，真係令人回味無窮。例湯：收銀阿姐話今日啲湯好好飲，係花生眉豆雞腳，話$15一碗好抵飲，叫我試喎，見佢咁有誠意，即管試吓啦！例湯非常足料，亦都無咩味精，都算唔錯。抗疫底下可以渡過一個難忘嘅冬至，真係好難得。