金記冰室 (創紀之城五期(apm)) (Closed)

今晚約咗一個好耐冇見嘅朋友去觀塘APM嘅金記冰室，附近太多嘢行，早到變咗遲到。我哋大家都叫咗鐵板餐，星期五放縱啲啦。我叫咗鐵板西冷扒餐，朋友就叫咗鐵板蘋果豬扒餐。大家都係跟薯菜，我都幾鍾意佢哋嘅粗薯條。西冷扒肥瘦適中，特別係鍾意佢一啖食到晒牛筋同牛肉。順帶一提，我哋係用QR code電話落單，所以牛肉幾成熟，用乜嘢汁，乜嘢配菜，都可以清楚選擇。講吓朋友個鐵板蘋果豬扒餐，我未見過，所以覺得放蘋果落去鐵板，特別新穎。感覺亦都健康啲。朋友叫咗無冰奶茶，其實我都想試，但係因為係晚餐，怕飲咗奶茶瞓唔着，所以叫咗綿滑蛋白杏仁茶，非常滋潤。同朋友嘅對話不外乎公司嘅人事複雜，工作環境氣氛，當我抬頭一望，即使餐廳非常繁忙，但係店員服務都非常殷勤友善，係喺呢一個艱難嘅時間，值得表揚嘅工作態度，令我特別鍾意呢一間金記！