糖佰府 (Closed)

是日，去完九龍城食越南野，意猶未盡，諗住搵間糖水舖食下甜品。 行行下就見到糖佰府，諗起唐伯虎點秋香，見個名都幾得意就入去試吓啦。 入面細細間，牆上面貼住好多明星黎食過嘅相片同埋食物嘅相片。 睇吓Menu，選擇都幾多，冷熱都有得揀，價錢又唔貴喎，都係30幾至40幾蚊一個甜品，所以一口氣就試咗三樣。 法式玉桂蘋果批 $35即整熱辣辣，未食已經覺得好香，蘋果批脆卜卜，咬落鬆化，玉桂味香濃。 外層係酥皮，中間係一片片薄層嘅蘋果，下面熱上面凍，配搭曲奇味嘅雪糕好夾，唔會好甜。 芒果棉花冰 $40黎到好似一座山咁，棉花冰牛奶味好濃，入口即溶，食落去覺得好軟滑 芒果唔酸好新鮮，芒果汁都好多，撈埋棉花冰好好吃。 無花果雪梨燉海底椰 $30熱食，係咁凍天氣下食呢個甜品真係覺得好滋潤，飲落去覺得好香甜，食完驅趕晒所有寒意，喉嚨亦都覺得好舒服。 呢度嘅甜品真係又平又高質素，老闆娘招呼都好熱情，值得試下。