兩姊妹涼皮有限公司 (柏樹街) (Moved) New Location

由三年前食兩姊妹食到而家，基本上成個meau都食勻，一直都覺得味道不錯，質素穩定，價錢相宜，作為飯前小食甚至女士想食少少當一餐絕對不錯。但近日見到某啲人無的放矢，乞衣到數有幾多條青瓜絲，拎city super嘅沙律呢啲唔相關嘅嘢去比，仲惡意抹黑話要特登寫多幾個食評刻意寫衰兩姊妹。你有你反對我有我中意，今日一於寫下我最中意食嘅重慶涼面。兩姊妹嘅涼皮基本上好快就賣哂，所以好多時去到就得返涼麵。本身淨係食開涼皮嘅我決定一試，頓時覺得多左個選擇。涼皮 VS 涼麵涼皮就滑捋捋啲，索哂辣汁好惹味，但食完可能就唔係咁飽肚，硬係覺得意尤未盡，飲多幾啖湯都係未夠喉。涼麵就相對硬身，未必咁掛汁，但相對飽肚啲。再加上涼麵係同青瓜絲同芫荽一齊上，一淋一爽嘅口感真係愈食愈開胃。食完之後仲有碗底嘅漏網之魚豆豆可以連香辣湯汁撈埋上嚟食，脆口非常，29蚊嘅價錢完滿地解決一餐。