麵創坊 (Closed)

琴晚接大人收工，之後大人就帶我去左呢間野食。湯面，撈面為主，有少量小菜，仲有飯和小食。我要左碗牛根腩魚片頭湯河（大地魚湯底），大人就要麻辣雞粗面，另加蝦子芥蘭和炸大腸。先講下我碗湯河先，都係雞湯為主，上面灑了（相信是）大地魚粉，湯底清清地，但係有味，一旁好似有少少腩汁，但係飲湯時唔覺，只係覺色水有少少唔同。河粉係幼身河粉，依家好多地方都唔會有粗身河粉。（只得一兩間的干炒牛河係用粗身河粉，口感絕非幼身河粉可比，此乃後話。）蘿白夠「淋」，都有點味，魚片頭就冇咩特別，根腩都唔錯，唔會好似出面集團式果些「淋」哂，牛根都仲有嚼感。大人碗粗面，我試左一啖面，湯底都香，好少少既辣味（本人食得辣，所以唔覺有料），雞就斬件上，有少少怪怪的，可能碟仔上會觀感好點，又或者雞絲啦（可能餐牌有我唔知）。蝦子芥蘭就可能蝦子多了點，我覺得有點鹹，可能病緊，口淡淡啦。炸大腸就冇咩特別，係炸得干了點。之後，偷望下鄰桌果個飯先，唔吸引我，所以放棄。服務唔錯，不時幫我地加水，好有禮物，值得嘉許。整體黎講，都算好食，適逢其會，都值得介紹一下去食。