Video
Read full review
2009-06-30
25 views
一年一度爸爸節又到，事前當然係請示爸爸喜歡食咩，爸爸話想食扒，既然爸爸同細佬都咁喜歡食燒牛肉，就一行五人去試呢間全球出名煮Prime Ribs嘅餐廳啦，餐廳位於銅鑼灣利園一期4/F，停車場Lift可以直達餐廳樓層。餐廳位佔據4樓全層，reception隔離有個lounge，可以比大家喺食飯前飲杯嘢傾吓計先。入面除咗一個主堂之外，仲有幾間party房，可以開私人宴會用，牆上面有個書櫃嘅裝飾，擺放咗好多書本喺度，做到好似書房咁樣。每張枱都非常之闊落，空間感絶對有多冇少，枱與枱之間亦相距甚遠，就算係大肥佬都唔會覺呢度焗促 ; 燈光柔和偏暗，一貫西餐廳作風，但又至於暗到自己食咩都睇唔到。坐低後，一個穿著女傭裝嘅侍應小姐已經端上餐牌比我地在坐每一位，先比咗幾杯凍水我地，大杯就唔使講，佢地嘅水杯都頗為特別，杯身喺成橢圓形杯口，咁樣令你拎起水杯時就更加就手。侍應姐姐簡單為我地介紹一吓佢地餐廳嘅主要菜式，同埋佢地為咗今晚父親節所提供嘅set，好讓我地先考慮一下。兩位女仕同我要咗父親節special set，父親大人同細佬就 a la carte 叫 Prime Ribs，爸爸另加了一個龍蝦，鐵板炒磨菇
餐廳位佔據4樓全層，reception隔離有個lounge，可以比大家喺食飯前飲杯嘢傾吓計先。入面除咗一個主堂之外，仲有幾間party房，可以開私人宴會用，牆上面有個書櫃嘅裝飾，擺放咗好多書本喺度，做到好似書房咁樣。每張枱都非常之闊落，空間感絶對有多冇少，枱與枱之間亦相距甚遠，就算係大肥佬都唔會覺呢度焗促 ; 燈光柔和偏暗，一貫西餐廳作風，但又至於暗到自己食咩都睇唔到。
坐低後，一個穿著女傭裝嘅侍應小姐已經端上餐牌比我地在坐每一位，先比咗幾杯凍水我地，大杯就唔使講，佢地嘅水杯都頗為特別，杯身喺成橢圓形杯口，咁樣令你拎起水杯時就更加就手。侍應姐姐簡單為我地介紹一吓佢地餐廳嘅主要菜式，同埋佢地為咗今晚父親節所提供嘅set，好讓我地先考慮一下。
兩位女仕同我要咗父親節special set，父親大人同細佬就 a la carte 叫 Prime Ribs，爸爸另加了一個龍蝦，鐵板炒磨菇 for sharing。每一個 Prime Ribs 套餐都會包埋沙律、薯蓉、Yorkshire Pudding、忌廉辣根醬。佢地仲有另一款主菜 Sea Bass & Lobster Tail，不過我地嚟得呢度，當然冇打算去試啦。
Waitress先同我地落單，佢果然訓練有素，只係憑記憶就可以記得哂我地嘅order，而且態度非常和藹可親，值得一讚。跟住佢簡單覆述一次我地嘅order，再解釋今晚晚餐嘅程序 ; 接住，例牌有兩籃麵包供應，之後我地一家人傾談咗一陣，其他菜式就陸續上枱：
1. Assorted Bread - 有法國麵包同另一隻稍為韌皮啲嘅麵包，法國麵包外皮非常薄脆，好新鮮，裡面嘅麵包又白又鬆軟，雖然應該係買返嚟，但係水準高 ; 另一款未必人人喜歡，因為有一陣香草味 ; 枱面有幾碟牛油，用上偏白又軟身類似日本出嘅牛油，麵包配牛油這個簡單組合係最絶配。
2. The Famous Original Spinning Bowl Salad 冰旋翡翠沙律 - 侍應姐姐搬來一大堆工具，放置喺我地座位嘅隔離，原來就係佢準備為我地即席撈出嘅招牌貨之一的沙律，一個大玻璃器皿中放有好多碎冰，之上再放置一個大銀兜，姐姐先將蔬菜放入盆中，手動旋轉嘅時候，再倒入沙律醬，最後加上新鮮車厘茄就完成。呢個沙律比我嘅感覺係好膩，食完都包咗幾成，事關佢係落千島醬，侍應仲介紹枱面上有一種印有佢地招牌嘅胡椒，比你加入沙律度，蔬菜非常多汁爽脆，入面再加入碎蛋，我地一家人最接受唔到係佢加入一種紫紅色的瓜，味帶少少酸，但係做唔到開胃之餘，反而令到整個沙律味道有少少怪添。
3. Fresh Crabmeat Au Gratin 法式芝士焗釀蟹蓋 - 上枱時真係嚇咗我一跳，因為餐湯都係同一時間上枱，但係呢個嘅size就真係細咗啲，唔係真係咁慳皮嘛，咁袖珍嘅?? 完全唔似食緊American food，這道菜係用匙羹嚟食，入面真係全部蟹肉，上面舖上芝士嚟焗，伴碟嘅青瓜同車厘茄都係擺得幾有心思，不過美中不足嘅係竟然有滴類似肉汁喺碟上。
4. Lobster Bisque 龍蝦濃湯 - 稀杰適中，龍蝦味非常濃郁，再加上一件由原隻龍蝦鉗拆嘅肉，真係啖啖肉，又爽又美味，口感一流，出手咁重，真係唔係度度都有得吃。
5. Roasted Prime Rib of Beef Au Jus 特級燒牛肉 - 終於輪到今晚主角出場，佢係由廚師推住一架好大嘅銀造餐車出場，氣派十足，去到我地面前，侍應姐姐再問我地要幾成熟同埋要幾厚，呢度有四種size，跟 Fathers' Day Special嘅係最薄嘅 The California Cut 加州薄切 (6oz)、The English Cut 英式三片切 (7.5oz)、最傳統最多人食嘅 The Lawry Cut 招牌美味切 (10oz)、同埋最厚切嘅 The Diamond Jim Brady Cut 金百帝厚切 (16oz)。配埋gravy，肉質鮮嫰，但係就唔係個個位置都咁軟熟，尤其係細佬嘅Diamond Cut，中間嘅部份雖然唔算得上係難咬開，但係就肉質幾實，睇見都唔係咁想食，不過我地其他人嘅份量少啲，相對近外邊燒過嘅地方較多，算係幾鬆軟美味，而可能始終我地一家人都比較喜歡食pan-fried嘅steak，想要牛肉煎香嘅感覺，相對冇咁buy呢度prime ribs嘅煮法，而且輪好吃程度，其實就算去文華dinner buffet嘅roast beef，我可以話水準都泊得住呢度。仲有兩款佢地獨有嘅辣根醬Whipped Cream Horseradish，一款係Cream啲，另一款係辣啲嘅，不過我就覺得始終係原味最好。主菜之外仲有幾款side dishes：
(i) Mashed Potatoes and Gravy 香滑薯蓉 - 每一碟都會有一堆薯蓉，薯蓉中間用工具整成一個類似山谷嘅形，方便放置Gravy喺中間。
(ii) Yorkshire Pudding 英式烘薄酥餅 - 明明呢間係一間美式餐廳，何解會有英式傳統嘅食品呢，據侍應姐姐解釋，佢地嘅Yorkshire Pudding係英式同美式所混合的，姑勿輪係邊度嚟嘅，最緊要係佢整得好鬆軟，上枱時原本係用一大個煎pan裝住，咁樣做可以保持溫度，因為一凍，個酥餅就會開始下塌，根住waitress會幫我地分咗佢，不過未必人人喜歡食，不過對於習慣食西方食物嘅我，配合埋Gravy嚟食真係有另一番回味。
(iii) Choice of Creamed Spinach, Creamed Corn or Buttered Peas 忌廉菠菜、忌廉粟米或牛油青豆 - 忌廉菠菜加入奶油，好香好滑，再加入少少肉碎，菜中帶有少少肉香，味道更豐富 ; 忌廉粟米嘅又鮮又嫰，再用牛油加埋奶油去煮，香氣撲鼻，好食到不得了，但係亦都非常膩，真係食兩啖已經飽。
6. Sizzling Skillet of Mushrooms 鐵板炒磨菇 - 用上幾款磨菇，配合埋大量嘅蒜蓉、牛油、香草嚟炒，放在鐵板上炒，直接上枱，又熱又香。
7. Mango Mousse Cake 香芒慕絲蛋糕 - 慕絲打得好滑，芒果味濃郁，但唔會太甜，適合香港人口味，再加上用新鮮芒果在旁，雖然芒果肉唔係好熟好甜，但係反而平衡咗慕絲嘅甜度，面頭舖有三粒不同嘅莓，再有一塊香脆嘅焦糖片，論美觀、味道、口感絶對係上乘之作。
8. Warm Chocolate Fantasy Cake 暖朱古力蛋糕 - 佢嘅做法好唔同，係一件蛋糕，而唔係焗咗個朱古力蛋糕，入面有熱熱嘅chocolate syrup可以流出嚟，咁樣就已經變得冇意思，因為冇咗熱熱嘅朱古力醬撞埋凍凍雪糕一齊食入口嘅得意感覺，而且朱古力醬係比一般為杰，朱古力蛋糕亦都太甜，雪糕係Vanilla，再有鮮忌廉，食完可以肥十磅，非常切合美式傳統，但係本地人就未必咁啱了。
Comments: 可能因為其他地方都可以食到近似嘅水準，雖然唔多，但要專程嚟呢度食嘅意義變得不大，相對上溢價偏高，可能一部份成本就係去咗食環境、地方、空間、同地段。服務亦都係非常專業，唔會無端端去騷擾客人，大家未食完一道菜，侍應會等大家都吃完嗰一round後，至再繼續上下一道菜，非常細心，流程控制得幾好嘅。不過始終都係嗰句，出名還出名，最緊要係味道本身，雖然唔會難食，但又未至於完美暇，去呢間世界名店試一試，算係值得嘅。
Post
