一樂小鍋 (Closed)

紅菜頭麵+金菇+貢丸+牛腩紅菜頭麵好特別，而且夠哂煙韌又有淡淡紅菜頭味，夠清新又同車仔麵既餸好夾。貢丸好彈牙同埋菇味好濃，牛腩炆得好淋而牛味又重。重點係個五香腩汁湯底，好香牛腩味而且唔油又夠味，似係出面牛腩舖既湯頭，好有驚喜!上海幼麵+牛腩+豬腸+魚腐湯底基本上都一樣但就加多咗兩羹辣椒油，因為我食得辣所以個辣味對我嚟講唔會好勁，但反而係令到成個麵層次更加豐富。豬腸係有用滷水腌過所以好入味，豬腸味好濃好特別，至於魚腐就一般。 反而凍奶茶都好飲，應該係用咗蔗糖所以甜味既感覺好特別，加埋奶同濃既茶底，成杯奶茶都好出色!