目利きの銀次 (Closed)

Item: Mekiki no Ginji
Rating: 3
Author: 奧志雷

Mekiki no Ginji

3.5

159 Reviews

Taste

Decor

Service

Hygiene

Value

2551

Tuen Mun

$201-400

Japanese

奧志雷

Level4

2.1K

Read full review

經常都係幫襯板長壽司，一係就泰發泰國餐廳真係食到有點悶，終於有機會試試目利喇 ﹗依慣例都係我最早到，門口接待姐姐真好，給我四人廂座真舒服，非常有私隱，但要應承九點前還檯呢，因為有客訂了。

四眼侍姐姐都好，耐心講解菜色及替我落 order。恤衫侍應哥哥都好，主動招乎，笑面迎人。就算下欄叔叔不能替我落單，都友善地幫我叫侍應過來幫忙呢。侍應四眼妹妹親切有禮，笑容甜美又靚女。搞到人家心臟卜卜跳，好 sweet 啊，初戀呀 ﹗

一路進入餐廳心臟地帶，估唔到裡面大得誇張呢 ﹗有很多 VIP 房喎，不過大廳就真係有點細又迫迫夾夾，所以造成錯覺啦。其實已上網睇過食物及食評多次，不過坐低無野做，都係翻弄一下所有 menu 啦。似乎以料理為主，刺生、壽司種類不多。

Orion 沖繩生啤，買一送一勁抵飲。不苦而帶甘，啤酒味不太濃，味道清爽。還未有機會到沖繩一遊，先在這裡幻想一下、感受一下，一飲而盡，吐吐工作後的幸勞，舒服晒 ﹗一反傳統，由濃食到淡。先食香口炸物燒物，再到刺生壽司，先熱後冷錯晒。

炸魷魚鬚，最愛鬆化炸漿，最憎硬掘掘的呢 ﹗薄薄炸漿黏附在魷魚鬆上，香脆金黃，雖然略油，但口感味道都很喜歡。牢牢包著鮮彈魷魚鬚，魷魚味香濃，好好食喎。

軟殼蟹天婦羅，兩隻只需 $128 蚊緊抵呢。雖然自稱天婦羅，始終未能達標，沒有天婦羅的影子，是有炸的真身罷了。洒上鮮檸檬汁，起動 ﹗蟹腳炸得有點硬，趙到卜卜脆。蟹身爆晒膏，甘香無比蟹膏跟軟殼及蟹肉混成一體，味道超級濃厚，肉甜殼香膏甘，百花齊放，味道非凡，近乎完美。

喜之次一夜干，身價 $138 蚊，不能與尖沙咀京旬的 $1200 蚊相題並論。略烤焦香飄飄，微溫送上。肉質結實而極具彈性，海魚味濃厚，醬汁醃味亦不弱，甜甜的又咸咸的。

烤珍寶帆立貝，侍應已叮囑快一點吃，不然會過熟喇。我已立即處理，但實際上送到時已在 overcook 邊緣了。過熟使到鮮甜味流失及揮發。味道還可以，普普通通沒驚喜，清淡醬油調味，帶子肉有點乾硬，帶子裙邊就爽爽韌韌的，帶子內臟保持軟塾。烘烘烈火的賣相一流，演譯吸引，不過時間要掌握得更用心更仔細，侍應傳菜到食客手上需要時間的呢。

牡丹蝦刺生，世界知名頂級刺生蝦，赤蝦那有得跟她比呢。蝦肉閃閃發光，濕潤立立令。入口黏黏，趙落爽彈冰涼，鮮甜蝦味醇厚，添上少少 wasabi 及少少豉油作點綴，使味道提升至極限，直衝腦袋。大量蝦膏甘香非凡，出類拔萃，全部沒收到肚裡去。創新食法，將蝦膏塗在蝦肉上再一齊品嚐，滋味無窮。

超豪華卷，真的豪華到直 $188 蚊？都係叫豪快卷悅耳一點。實物跟照片都十分像樣，徹底解構一下先。原來最底係 6 件鐵火卷，上面鋪上吞拿魚腩蓉、馬糞海膽、帶子及三文魚子。食落有點狼狽，各自各精采，根本無辦法可以一啖鯨吞落肚，情緒有點低落。

有諗過每樣食材都放少少在鐵火卷上，但都係太過高太過大件，一夾起又跌晒喇，放棄。最後變成馬糞海膽鐵火卷及吞拿魚腩蓉鐵火卷各一，三文魚子帶子鐵火卷兩件及淨帶子卷兩件，自由創作。

馬糞海膽每粒都完整結實，冰涼地送到舌齒之間，跟飯粒混和。先彈後滑，鮮味帶微甜亦帶著微弱腥味，高級食材質素顯注。大量海膽已完全掩蓋紫菜吞拿魚鐵火卷既味道，強烈而霸道，不過我很喜歡 ﹗

吞拿魚蓉瘦得要緊，雖然呈粉紅色，但質地乾涸，油脂稍削而味淡，不夠油潤就沒有什麼賣點了，失望 ﹗三文魚子咸香飄飄，表面黏黏的一咬爆開，甜美無比的汁液啊 ﹗

帶子刺生肉質似乎有點過份堅廷及實淨，隱若還食得到帶子甜味。是否品種問題嗎？我買回家中的盒裝北海道帶子刺生是超級軟塾滑溜，超級甜美的啊。不過跟三文魚子及鐵火卷合體後，味道得以昇華進化，好食多了。

油甘魚壽司，魚油一般，魚肉滑而嫩，泛著輕的的魚甜味，通關。吞拿魚壽司，赤肉部位都會較瘦較淡較鬆，味道質地都比預計中濃郁棉滑，滿意。帆立貝壽司，結實的肉質都幾特別，味道沉實不像食慣的清爽天然帶子魚味。

手握壽司飯非常完美，黏度剛好，夾著不散，入口才散開。飯粒乾爽飽滿嚥韌，泛著醋香飯香。高水平的協奏，難得的質素。想自己話事食什麼壽司，所以放棄食壽司併盤啊，價錢經濟合理。

我對壽司飯要求甚高，坊間擁有滿意飯粒的日本料理真的極少數呢，連飯都處理得未如理想，還能做壽司嗎？所以我食刺生既比例遠超壽司囉。

蟹肉厚燒玉子，沒有原味淨燒玉子供應喎，全部都有餡呢。熱騰騰輕煙飄送，即叫即做無得輸。厚厚蛋皮幼滑，跟食開既實淨玉子燒完全不同，難能可貴，讚。切開發現捲著大量蟹肉，似足蛋包蟹肉卷。

表層鋪上沙律醬及咸香蟹子，急不及待大大舊滾熱辣塞入口。蛋味芬芳，蟹肉甜甜味濃而濕潤，又幾好食架喎。突然使我念掛北海道即做玉子燒，完全無想過玉子可以好食到那個境界呢 ﹗

超濃厚雞湯烏冬，湯汁超級濃而厚，雞汁味超強，不是普通水汪汪清雞湯，微量雞油使到湯溫更加高，出晒熱又燙嘴，大愛 ﹗菠菜超級爽甜，吸埋雞汁就更可口，太美味喇。

白烚雪藏雞髀一般的平凡，味道淡淡的，肉質有嚼勁，雞皮黏滑，我突然覺得似鴨腿湯飯既鴨腿肉囉，麻麻地。手打烏冬無投訴，嚥韌彈滑，米香醇厚。讓特濃雞湯浸著一同大大啖掃入口，滾燙的雞湯加頂級烏冬，洒點 wasabi 醬油，那有不好吃的理由 ﹗

特上刺生盛併盤，賣價 $398 蚊真的 2-4 人份量嗎？我一個最少都食三盤啦。珍寶帶子屬爽口類，不是棉滑類品種，甜味較清淡，一般。油甘魚腩夠肥美，油潤令立立，香甜可口嫩滑。馬糞海膽半板，溫柔地放在紫菜上，慢慢嘴嚼，讓海膽充份地跟紫菜混和，冰涼的感覺非常舒服啊 ﹗薄薄香脆紫菜勒一聲破開，十分悅耳的聲音 ﹗

池魚皇刺生薄切，白肉一向都是較瘦較淡，配上果醋恰到好處。魚肉結實嚥韌而味道清淡，果醋酸酸醒胃醒腦。如果有薑蓉及蔥花就好喇，捲住再點果醋，無得頂呀 ﹗

軟殼蟹卷，乾爽醋香飯粒夾著牛油果連蟹肉蟹膏在舌尖上打滾融合，對不喜歡食反卷類的我都覺得不錯呢。朋友想食炸蝦卷，不過目利無供應。朋友唔食牛油果，挑晒出黎交我處理。

海膽汁燒蠔，抵食 $98 蚊有四隻喎，呎碼都不小。鐵板香噴噴吱吱喳喳，鬼殺咁嘈送到 ﹗侍應妹妹溫馨叮囑小心熱啊，整個人都 warm 晒啦。驚喜的料理 ﹗燒得極香口鮮蠔，沒半點腥嗅味道，新鮮度極高。

肥嘟嘟脹卜卜，一咬爆汁 ﹗甜美無比而濕潤，幼滑又無渣，沾上甜美海膽汁更是如虎添翼 ﹗就連墊底的菠菜都一樣爽甜，菠菜夾著肥蠔同吃，別有一番風味。必食大大力推介 ﹗

鹽燒串燒併盤，雞中翼外脆內嫩，皮香肉滑，雞肉白白淨淨，調味得宜剛剛好，肉汁也保全得宜，好食的呢。燒煙肉蘆筍卷，煙肉釋放油香，變得乾爽嚥韌帶焦香。爽甜蘆筍吸收煙肉油香後，味道更豐富更可口。

燒煙肉車厘茄，煙肉烤過後，咸肉味道更加濃縮。車厘茄烤過，甜茄味道更加濃縮。極甜撞上極咸，擦出火花，味道層次複習，當然好味道啦。燒鵪鶉蛋，印象中係第一次試，嚥韌蛋白跟甘香蛋黃還有焦香，有點單調平凡。

燒黑豚肉片，十分爽脆，極彈有咬口，豬甜味濃厚，海鹽豬油加焦香，要來多幾口啤酒，正啊 ﹗燒雞肉漢堡，免治雞肉餅入口鬆軟，趙落粗糙，多汁濕潤，味道濃厚，不過不失啦。燒粟米，有點過火導致乾乾地。牛油自己搽，不是一齊燒就不夠均勻啊。