莆田 (Closed)

黎到馬鞍山呢個美食沙漠搵野食，見到呢間新加坡餐廳係米芝蓮一星，而且咁大個女都未試過莆田菜，應該都幾特別，本著一試無妨既心態，於是就去試下啦!蝦苗伴頭水紫菜外觀好吸睛，賣相好靚好精緻，外面用左青瓜圍邊，成道菜味道酸酸地，好開胃，而頭水紫菜好爽口，而且營養價值高，食完之後感覺好似健康左，哈哈，另外入面有啲蝦米，食落口都幾清甜，作為頭盤，又真係幾好食。酥炒芋芯芋頭表面包住一層糖，外面脆身帶甜，內裡又好軟滑，又鹹又甜，有驚喜。百秒黃花魚賣相又係好靚，黃花魚魚肉好嫩滑又好鮮甜，而且個湯加左薑既關係，一啲都唔覺得腥，仲覺得好香，好好味，鍾意食魚既人一定要食下。莆田鹵麵聽聞係莆田既傳統美食，呢個鹵麵比我地平時食既麵會杰身啲，有啲食羹既感覺，份量夠多，入面有蝦同蜆，味道好香濃，唔錯。紅菇燉土雞第一次食野生紅菇，聽聞對身體好好，個湯上枱時又係好吸睛，因為個湯係紅紅地色，雞肉燉到好嫩滑，火候夠又足料，飲落口係好清甜，一啲都唔油，真係好好飲。蓮子銀耳湯呢個甜品好滋潤養顏，甜度適中，為呢餐劃上完美既句號。總括黎講，環境唔錯，價錢唔貴，食物質素好，尤其是紅菇燉土雞同百秒黃花魚，真係好好味，下次一定會再去。