Slluks T2 (Closed)

台式飲品店喺香港開到成巷成市，喺登打士街都新開左一間，有別於一般嘅台式奶茶，呢度主打水果茶，非常適合夏日炎炎嘅日子。除咗果茶之外，呢度亦都有果蓉茶，氮氣茶，鮮果沙冰，奶蓋純茶，冷泡炸彈茶同埋純茶。氮氣茶都係第一次聽，經了解後，知道原來係以冷泡茶加入氮氣，透過綿密氣泡突顯茶嘅香氣，充分釋放茶香。是日試嘅係荔枝綠研茉莉氮氣茶，用可再次使用嘅膠杯盛載，店員仲話膠杯可以攞走，作為紀念。賣相好似啤酒，入口唔甜，茶味香濃，非常清熱解渴。除此之外，我哋亦都試咗招牌果茶。一共有五個選擇，每一杯都以唔同嘅英文名黎命名。Tommy 超級特調果茶係以茉莉茶 ，芒果 ，菠蘿 ，西柚 ，士多啤梨，火龍果同薄荷整成。水果茶生果十分足夠，茶味非常濃郁，味道清新，係冇叫少甜嘅情況底下，都唔會太甜，非常解渴。飲完之後，仲可以食杯裏面嘅水果，唯一美中不足嘅係用飲管好難食啲水果，如果有埋匙羹供應，咁就更加好啦。