群記牛肉圓豬手

Open Now

Now Closed

行完山搵個地方醫肚先，傳聞粉嶺群記豬手好得，撞啱今日有地頭蟲文廸姐係度，就跟住佢去搵食啦！咁晏可能咩都賣晒無野食架喎，去到先算啦。裝潢保持幾十年前古色古香，老麵店架局，燈光暗暗，掛場風扇、天花吊扇、摺櫈、牛角扇、不設冷氣開放，果真好有風味！初戰群記，太晏無豬手喇，河粉賣晒、牛卷賣晒，所以唔洗等位一到就入坐添。只有豬手、牛丸、牛腩、牛肉炸卷賣既群記，唔食牛就只有豬手了，連豬手都無就食淨粉麵啦！牛腩牛丸麵走蔥，牛腩碎麻麻地，乾鞋又多肥膏無咩肉食，豉油味重而濁，唔多喜歡。小牛丸 good 喎，細細粒容易食，手打丸質地幼滑，淡淡牛味不算濃，肉汁微微還可以。清清的湯底，幼麵平庸普通掛上湯汁都蠻滿意。辣椒油非常獨特，香濃而不辛辣，濃厚麵醬味道帶甜味。一小碗麵我要用上兩大羹已夠喉呢，自助添油。剛剛辣油沽清撞上侍應姐姐親手調製呢，原來唔係一早調好，見姐姐將辣椒渣跟其他不知名醬油混合就完成喇。不明白何解如此質數日日大排長龍呢，一定要黎會一會佢既豬手先得！