天聚源 (Closed)

係屯門住左咁耐，從來無去過藍地食飯，今次竟然俾我發現左一間別有洞天既餐廳。我和朋友點左個二人海鮮餐。開始蒸前服務員會先放米和水係煲底，然後就可以蒸海鮮。我地又貪心又肚餓，所以一次過蒸幾款一齊食。但正常黎講，應該根據餐廳既建議時間蒸，海鮮會更鮮嫩多汁。先蒸一隻新鮮嘅帶子，餐廳非常細心，已經去晒所有嘅裙邊及內臟，但帶子肉仍然非常大粒，肉質鮮美而且啖啖肉。雖然蝦只有4隻，但係每一隻都好新鮮，嚟嘅時候仲係郁緊，蝦肉都好彈牙。龍蝦真係不得了呀！龍蝦有好多膏同埋好新鮮，一邊被蒸一邊掙扎，見到都唔忍心食佢。其他嘅蜆都好鮮甜，基本上都無乜沙，只係偶爾有一兩隻有少少沙，明顯餐廳有吐過沙。初初以為雞無味道，就咁蒸嚟食好似好怪。食嘅時候先發現原來佢已經調左味，我跟足佢哋建議蒸6分鐘,真係非常之香滑同埋彈牙。羅浮山走地雞同平時食開嘅冰鮮雞真係好唔一樣。我見餐廳仲有其他嘢食，例如串燒同埋鹹豬手，不過今次食得太飽啦，下次有機會嚟嘅時候先再試其他嘢食。