樂樂冰室

Open Now

Now Closed

樂樂冰室用既材料係靚料，真係食得出有分別👍首先係佢哋嘅牛角包炒滑蛋配火腿，佢哋會用靚啲既牛油🧈，食落除咗牛油味更加香之外，而且亦都比較健康。而且雞蛋都係用返本地農場嘅雞蛋，新鮮送到。沙嗲醬有特別調制過，加入去湯入面特別惹味。至於佢嗰個焗肉醬意粉，係用純正嘅英國水牛芝士，芝士拉絲好長，同埋食落有一浸淡奶嘅香味，都幾明顯食得出同其他既焗肉醬意粉唔同，用水牛芝士係正啲。西多士好好食，佢哋係用新鮮嘅油去煎，咁樣會更加容易黏上蛋汁，而且顏色好靚，食落都健康啲。加上老闆選用香港農場嘅新鮮雞蛋，蛋味更加香。然後就去奶茶紅豆冰，佢呢度嘅奶茶係冇落糖，取而代之係用紅豆，飲落佢嘅味道好濃，比起其他普通嘅奶茶，我會覺得佢呢個更加好飲，仲可以食埋啲紅豆，好甜。最後嗰杯係叫做「唂咕」，開頭我都唔知係咩嚟，但係老闆同我哋講原來呢一個係懷舊特色飲品，佢嘅味道類似係熱朱古力，但係會有少少嘅苦澀，主要嘅材料應該係可可粉。呢度嘅老闆好好人，佢會上一款食物都會同我哋介紹佢哋嘅用料，都係一啲本地懷舊品牌，而且無論係牛油定係雞蛋都真係好有心機去揀，而且我都真係食得出係有唔同，整個用餐嘅體驗都覺得好好。