上咖啡

Open Now

Now Closed

Happy Friday 又係時候 Lunch食好少少，公司附近呢間上咖啡之前同同事食過，食物有質素，只可惜午市冇得訂枱，餐廳又位於1樓，上到去冇位一來一回好花時間。今日趁同同事兩個人食，我地就行上去碰碰運氣。上咖啡位於利嘉中心1樓，由地下行樓梯會穿過髮型屋先入到餐廳，第一次去都係同事帶路先知有間樓上咖啡店係度。我地13:00到，餐廳已坐滿客人，好彩今日排隊人數唔多，我地等左10分鐘左右就有位。餐廳裝修簡約，店入面擺放左書籍俾客人閱讀。今日午餐有七款，唔需要加一，價錢由$62至$92。我點左新鮮粟米豬扒飯，份量都幾多，新鮮粟米好甜，豬扒肉質軟腍，加$8配的凍朱古力唔會太甜，味道唔錯。不過由於份量太多，最後都食剩少少飯。同事點的係素食餐烤大啡菇黑松露意粉配可樂，賣相唔錯，而且黑松露醬份量都多，同事話味道唔錯，不過如果叫我全份午餐都唔食肉，我就唔得啦。呢度落單同執碟都係自助的，我地食飽飽就自己執好杯杯碟碟返工繼續拼搏。