和歌山 (Closed)

上兩星期在美麗華食四方去鼎泰豊既路上， 見到裝修唔錯既WAKAYAMA, 望下午市裝牌， 熟食定食約$78起， 有刺身既定食就由$88起。就講好搵日幫襯。今日再黎， 就係外面玻璃見到和歌山三個字， 先知原來間野係叫和歌山。我叫了個三文魚+野菜烏冬定食。等了一會， 侍應將下面個盤車埋黎。穿左個大窿， 要我問佢， 侍應先補句話：三文魚後上， 食住烏冬先。乜日本野唔係應該上刺物壽司先架咩。講點食物， 沙律普通貨。 個湯唔夠熱+淡。蒸蛋睇上去乾爭爭咁， 不過食落去都唔差， 雖然唔係水汪汪， 但都算滑， 同足料。野菜烏冬就清湯類似木魚湯果隻味。普普通通， 不過烏冬係令野， 類似稻庭風烏冬。飽左一大半三文魚終於到。有2件壽司+3片刺身+2件花之戀。講真淨依碟野都值返$70-80。仲要係肥三文魚。除左粗果條白色脂肪外， 你見到d肉入面都係一絲絲一絲絲白色脂肪。以唔係腩位而言， 佢d刺身真係好肥美。大推。至於點解我會比ok而唔係笑臉呢？因為個定食盤上面有隻虫仔（下圖慎入）希望只係我中頭獎， 而唔係店方衛生問題啦。