升哥點心 (Closed)

是日入元朗搵朋友食嘢，朋友帶咗我食呢間新式嘅點心。睇睇餐牌的確有啲好特別嘅嘢食，創新類點心。一坐低侍應就問我哋揀飲咩茶，一般酒樓可以飲到嘅茶佢都有，我哋就飲鐵觀音。啲茶係用一個個獨立嘅茶包沖嘅，另外有一大壺暖水可以自己加。由於小妹生飛滋，嗌咗個是日養生湯補下，當日係沙參玉竹花膠燉螺片湯。個湯真係好足料，飲落好甜，花膠湯就啱晒我呢啲咁貪靚嘅女仔飲啦。攞膽春卷：呢個創意點心其實就係喺個春卷上面放咗海膽，但好味在佢嘅春卷炸得好香脆，入邊全部都係蝦，連埋海膽同埋下面果啲自製沙律醬一齊食，估唔到有幾夾喎。蒜香脆脆蝦餃王：呢個10分推薦，因為從來冇食過外皮係脆嘅蝦餃，外脆內熱，蒜香味都幾重，連埋面頭嘅千島醬一齊食，完全唔覺得自己食緊蝦餃，好特別。提提大家食嘅時候要小心啲，因為入面啲蝦真係好熱㗎。籠仔醬爆黑椒牛仔骨飯：朋友好鍾意食籠仔蒸飯，牛仔骨好入味，送飯一流。小鮮肉小籠包：食親點心我都必食小籠包，呢度嘅小籠包好大隻，外皮又唔會穿，仲有好多湯係入邊添呀，啖啖肉，正！另外嗌左個白灼靚菜心，不過不失。總括嚟講，呢間點心幾有特色，經過嘅朋友仔可以一試。