意素園 (Closed)

真漢子再訪北角嘅意素園，一間加入咗福建菜元素嘅素食小店。上次嚟食係剛開張冇耐，咁耐冇嚟唔知有咩新嘢食呢？😋餐牌多咗自選麵餐，類似車仔麵，但嚟到呢度梗係食啲其他地方冇嘅特色嘢啦。我睇中咗「福來麵線」 $58 連小食同飲品，係純素㗎。👍🏻麵線食落好滑，又大碗，配料有好彈牙嘅貢丸，火腿，湯底有好多切碎嘅菜，紅蘿蔔絲同菇絲。麵線索哂啲湯，好入味，同埋由於麵線唔使點咬，基本上可以連埋湯當粥咁食都 okay 。😆小食係我上次食完好掛住嘅福建菜果（兩件），唔使問都係超好食啦。如果鍾意食蛋嘅素友亦可轉做炒蛋。🥚飲品我揀咗紅棗茶，真材實料，好味又有益。💪🏻另外試咗素肉羹湯 $48，原來湯底係蕃茄薯仔湯，好清甜。素肉應該係豬嚟嘅，味道同口感都幾可亂真，同埋真係好大舊同有好多舊，食極都仲有嘅感覺，鍾意素肉嘅朋友下次識嗌啦？😁食飽梗係食甜品啦，我試咗香芋餅 $25，個皮煙煙韌韌，個餡甜度啱啱好，食落真係充滿家鄉嘅味道。🥹以家鄉菜做主打嘅素食餐廳似乎冇乜，唔知有冇祖籍福建嘅朋友食過，覺得還原度高唔高呢？我自己鄉下係中山，又唔知有生之年會唔會食到有中山/石岐菜特色嘅素食呢？🤔