裕興咖啡 (Closed)

早起的鳥兒有蟲吃。呢朝一早黎到裕興，就係為左食佢既三文治。都咪話唔巴閉，佢地既三文治係量產既，試過好多時九點黎到都賣曬，唔特登早起身都無得食。另一個巴閉嘅地方就係，由你落單到整好有得食通常都起碼半個鐘，即叫即做，姐姐一坐低就會好有禮貌咁同你講要等幾耐，你可以自己決定等定係唔等。講好規矩之好，可以講野食啦。佢哋主打嘅有麵同埋三文治。食咗咁多次，每次都話下次要試下個麵，不過次次去到都忍唔住都係叫返三文治。佢地既三文治配料都係平時個d，不過所有三文治入面都會有椰菜同花生醬。係邪惡嘅花生醬！我叫左芝蛋牛治，一黎到熱辣辣，有爆多花生醬同芝士漏出黎，食既時候甩頭甩髺，因為真係太多餡料。所有味道都好夾，蛋牛咸咸地，花生醬甜甜地又真係好香，椰菜好爽口，成件事真係好過癮。大啖大啖咬入口，好快就食完。仲有杯奶茶，不錯的，夠滑夠有茶味。食完個呢度既早餐真係好滿足，係我每次黎開中環都必定會打卡既地方。