P.B.S. Premium Burger & Sandwich (Closed)

呢間漢堡包店取名P.B.S.，其實就即係全名Premium Burger & Sandwich，最近新開座落於銅鑼灣食肆林立嘅希雲街，今日就約埋朋友嚟試吓。霓虹光影下顯得店外店內都份外璀璨。呢度主打都係食burgers，另外都有一系列嘅小食可供選擇。我都係看圖識字嘅人，睇相見到大大隻龍蝦就一於叫返一個試吓。呢個原隻龍蝦三文治賣相真係攞滿分💯，三文治上佈滿切咗嘅龍蝦肉，仲有放咗龍蝦鉗，相當之有氣勢，醬汁配搭亦得宜，所以嚟到一定要叫返一客試試。另外再叫埋招牌至尊和牛漢堡。叫得至尊當然非同凡響，剩返睇佢嘅橫切面已經知道夠晒份量十足，和牛漢堡扒夠晒Juicy就已經係基本嘢，佢仲有煎蛋、牛油果、啡菇、煙肉、蕃茄、生菜、雙重芝士，仲有黑松露醬，我個口咁大都真係咬唔晒！芝士薯條每條薯條已經沾滿咗芝士粉，再喺上面「加料」，然後配合芝士醬一齊食，呢個價錢真係好抵食。黑松露薯條同樣係每條薯條都已經沾滿咗黑松露粉，再配埋黑松露醬，真係食到舔舔脷。果汁屬來自葡萄牙嘅樽裝飲品， $15一啲都唔貴。