勝八鉄板串料理 (Closed)

收到風，以前跟肥肥家族相熟o既日本料理師傅最近喺銅鑼灣一幢食廈出沒。正被醫生嚴管o既大肥爸爸就派小肥同契妹週五先去探路，等過咗我地嗰關佢先同靚靚媽咪出山到訪。師傅正駐守於「勝八鉄板串料理」及「勝八居酒屋」，分別為大廈o既十樓及十一樓，單睇門外大大o既水牌已可感覺到其氣派十足 。XO仔傍晚六點到達，睇完哂兩層不同o既裝修後，覺得十樓充裕o既光線及空間感更廣o既格局比較適合雙親 ，故亦選此為當日用餐之地。圍繞住牆邊o既散座全為絨墊梳化櫈，舒適大方。店子左邊位置原來仲可以間開，變成一間可容納二十多人o既私人房間，似乎喺度開迷你派對都得喎。 木造o既牆身並冇花巧o既裝潢，只係簡單以彩色o既粉筆字喺黑板上寫出時令推介菜式，簡潔企理。其實一入門口已發現餐店現正推廣緊兩款御膳套餐，不過深知唔啱大肥食，故今次亦作好準備散叫。師傅一見到小肥，可真雀躍萬分，仲話幾年冇見，一定要飲返兩杯先，真係客氣 ！眼見契妹手指甲上o既花紋咁可愛，其男同事見狀，即特別換上得意趣緻o既黑白小兔酒杯仔黎襯托一番 ，真令二人感到極受歡迎。細佬先同師傅道出當晚o既任務及自己o既愛好，然後就轉交叫餸o既重任俾佢，嘻嘻，