海幸壽司 (Closed)

陽光普照30幾度咩住個大書包半身濕晒，想食啲清新唔油膩嘅料理，遠離旺角咁繁囂嘅地方，去咗何文田勝利道搵食。我喺勝利道來回行睇咗幾間，最後見佢門口幾靚就入咗去啦。雖然入到去舖頭面積唔大但都算坐得舒服，而且音樂又舒服成個感覺都好chill。因為唔想食飯有兩款烏冬揀最後揀咗個魚湯海鮮烏冬，另外友人揀左個刺身定食。先講個烏冬，魚湯好夠熱而且好奶白色，天然無味精，海鮮好鮮甜，完全係新鮮貨，唔係冰鮮野。烏冬彈牙，成個配合都好match。成碗湯比我飲哂，正啊！至於個定食呢，個沙律醬汁好清新，另外仲有個茶碗蒸好滑，再加埋個有洋蔥香嘅麵豉湯，同平時嘅好唔同，唔係啲行貨嘢。啲刺身呢都算新鮮，個油甘魚特別好食。不過最可惜嘅係碗白飯唔算係咩上等嘅日本米，而且食起嚟略嫌有點爛。