加東 (Closed)

Sogo旁邊的澳門逸園中心係食廈，不過食肆消費偏貴，主打新加坡菜的加東算係比較平民化。食新加坡菜當然要叫個喇沙（$88）食下。賣相係幾靚，每種材料都幾多，有豆卜、蝦、魚片、雞蛋，仲有幾粒螄蚶。喇沙的靈魂當然唔係材料，而係湯底，加東的湯底唔算好香，椰汁味唔重，而係偏辣，初嚐冇咩嘢，但會越食越辣，嗜辣者可以一試。另外叫左碟海南雞（例牌$98）試試。呢度冇一set的海南雞飯叫，要分開點。先講雞，如果冇點任何調味料的話，本身冇咩味，雞味亦唔重，還好雞件都幾嫩滑。油飯（$18碗）顏色雖然唔深，但食落味道係足的，亦唔會好油。小食選左炒蘿蔔糕（$78），睇個樣黑麻麻一pat咁好似唔多吸引，其實幾ok，味道甜甜地，但最正並唔係蘿蔔糕（冇咩質感），而係配角炒蛋，醬汁的甜入晒炒蛋裡面，好好食。如果係銅鑼灣想食新加坡菜，又唔想等位，又想坐得舒舒服服，呢度係一個選擇。值得去指數：