麵屋豚豚拍子 x 辛味屋 (Closed)

包羅萬有日本菜@將軍澳天氣咁凍最適合烚下烚下，關東風嘅壽喜燒鍋有少少似打邊爐，但唔需要落咁多湯，味道微鹹帶點甜。依道嘅壽喜燒鍋有幾種唔同肉類，有雞肉、豚肉同牛肉，連埋飯或者烏冬都係 $80 內，CP 值好高。我見格離枱嘅咖哩飯都好吸引，咖哩味好香。牛肉壽喜燒鍋整得似模似樣，除咗牛肉之外，重有金針菇、冬菇、豆腐、胡蘿蔔同娃娃菜等等，配料都十分豐富。最重要就係唔少得生蛋，無論點咩都會變得香滑好味得多～ 我重點咗 ASAHI 生啤，食得盡興啲呢！因為日式壽喜燒用嘅鍋淺身好多，好快就煮熟啲嘢食得。娃娃菜同豆腐煮耐少少更加入味，甜甜哋。生雞蛋汁都係精華之一，蘸一蘸，牛肉滑順入口咁。熱辣辣嘅壽喜燒鍋配冰凍啤酒，實在嘅無得彈。食到最後就落埋啲烏冬，烏冬口感好彈牙且滑溜。拉麵係特濃豚骨湯底，再加上大量櫻花蝦，令到湯底濃郁中充滿海鮮鮮味，配料亦有兩隻海老呢。依個拉麵混合咗海老同豚肉，所以都有兩片豚肉叉燒～依道嘅套餐都有附送小食，不過我就加 $10 點咗炒韮菜豬肝，諗住韮菜香口啲，會適合佐酒多啲，哈哈。