九份•十分 (Closed)

住喺大西北有時真係搵間正常既餐廳都有困難，今晚去左呢間九份十份覺得佢好有試意，真係唔好以為係領展d商場就無好野。首先聽個名就知道係食台灣菜，餐廳都裝修得好有特色，好有台灣地道小食既感覺，而且座位夠闊落坐得好舒服，感覺唔錯。食物方面，首先係冷盤芭樂鳳梨鹽水雞，鳳梨夠甜好開胃，估唔到到咸咸地既鹽水雞咁夾。台灣鹽酥排骨粒幾有驚喜皮夠酥脆排骨又入味，仲可以按自己口味落調味料粉。忌廉芝士磨菇雞翼啖啖肉，芝士味香濃好邪惡但又好好味。紅燒三寶幼麵真係重點推介，首先份量勁多，三種餸都夠淋又夠入味，湯底好香，麵質彈牙煮得啱啱好，成碗麵都好出色，性質比好高。另一推介係宜蘭車站火腩大鱔煲，呢個黎遠都已經覺得好香，肉質彈牙，火腩夠哂入味，咸咸地好香口。最後係特飲宇治抹茶紅豆鮮奶，奶滑茶香，我覺得味道比平時街邊一杯杯果d更好飲。青青草原好重茶味帶有少少奶香既沙冰，解暑一流。九份十份已經成為我北區其中一個食堂👍