大越越南餐廳

Open Now

Now Closed

話說河畔花園呢度有個俾小朋友玩嘅交通城，對於比卡豬嚟講當然好玩啦，可以玩吓車仔又學到嘢!玩完肚仔餓要搵嘢食，原本諗住食意大利粉，點知行到嚟原來已經變咗係一間越南餐廳，都好，我同太座都鍾意食!睇餐牌食物種類多，眼花撩亂，搞到我地心大心細!越南菜當然要食生牛肉湯粉，呢度嘅湯底較清甜，冇騷味，蘿蔔當造一定好味，牛肉都幾嫩滑!大越三寶飯，有埋店名嘅應該係招牌嚟，果然唔錯，有香茅雞翼、豬排同扎肉，配上特別豉油，連比卡豬都爭住食!峴港胡椒扎蹄，同扎肉唔同，似我地嘅鎮江餚肉，好特別!芝心蝦多士，蝦多士唔係度度食到，呢度仲要有芝心，食咗兩件，想食第三件俾太座話再食唔使食其他嘢!馬拉盞炒通菜，一定唔會差嘅菜式，啱重口味嘅朋友!食越南菜我最鍾意飲椰汁綠豆冰，清熱解渴!店家送咗鮮鴨粉腸俾我地試吓，對於鍾意食粉腸嘅我都覺得唔錯，下次嚟可以叫鮮鴨粉腸湯粉食!