知粥嘗樂 (Closed)

聖誕假期又食大餐又飲酒，自己都覺得好過份，仲有小小食滯咗咁，所以今晚就去咗北角呢間知粥嘗樂，希望食得健康啲。我叫咗個沙巴龍躉粥，貪佢夠營養價值高，可以健脾補血、調理腸胃等，啱哂我聖誕狂歡過後贖罪。龍躉嘅魚肉比一般魚肉粥食到嘅結實，而且魚皮好滑，膠質非常豐富。粥亦煮到好綿好厚實，食到好飽好滿足，餐廳另外上咗豉油同蔥調味。但係食粥當然唔少得油炸鬼啦，油炸鬼炸到好香口，浸少少粥食又軟又脆，口感一流。我哋仲叫咗碟油菜，腍得嚟翠綠嫩口。我朋友就冇咁乖喇，叫咗火山石燒美國特級牛柳，上菜嘅時候牛柳熱辣辣，燒到咋咋聲，概有五成熟，仲見到鮮嫩嘅粉紅色，食客可以按喜好即食或者繼續燒。隨餐仲附送沙律、羅宋湯同羅漢果，非常抵食。