店小二

Open Now

Now Closed

朋友帶我去咗北角嘅店小二食鑊氣小炒，叫咗以下菜式。避風塘爆茄子：好多炸蒜，超級惹味。茄子外脆內軟，入邊仲好Juicy添。蒜蓉素翅蒸扇貝：用素翅代替粉絲，更加有咬口。扇貝啱啱熟，所以質感好軟熟，一啲都唔韌。萬字醬油雞：豉油味好香，味道有層次感。雞皮算薄皮。雞肉嫩滑多汁。最底層仲有啲鉛筆菇，咬落爽口，同醬油味都好夾。黃金蝦兩食：黃金蝦有五大隻，蛋黃香濃惹味。佢仲有幾舊牛角包，比你配埋中間嘅咖喱一齊食。呢個菜式上枱嘅時候都幾靚。自己好鍾意食咖喱，就自創將啲咖喱配埋黃金蝦一齊食，其實都幾夾咖。梅菜蒸菜心豆腐：梅菜唔會過鹹，放喺菜心同豆腐面蒸，增加味道層次。豆腐好滑。菜心都好幼嫩。