魂 (Closed)

餐廳主打四款拉麵 - 魂、火魂、太極、青龍。原本覺得青龍幾吸引，不過因每日現做嘅湯底製作需時，要晚巿先供應，而我地又不嗜辣，最後叫咗【魂】同【太極】兩款拉麵。落單係用平板電腦，麵條軟硬度、調味濃度、追加配料等等都可以選擇，一目了然。餐廳亦供應多款小食，大部份只係十幾二十蚊，都幾抵食。飲品叫咗【日本梅子雪碧】，少少一粒梅子令到雪碧酸maymay，幾好飲。【太極$98】叉燒、流心蛋、蟹膏+金箔拉麵，湯底係墨魚汁配豚骨湯。叉燒嘅上面擺咗蟹膏同靚靚金箔，濃濃蟹膏味，正。先試啖墨魚汁配豚骨湯，味道幾濃，好似仲有啲芝麻味。麵條揀咗中等軟硬度，掛湯能力高。可惜嘅係叉燒只得一塊，唔係好夠喉。【魂$88】濃豚骨湯底配叉燒同流心蛋拉麵。都係純豚骨湯底啱我多啲，大量香蔥令湯底濃得嚟又帶啲啲清香，可惜同【太極】一樣都係只得一塊叉燒。【日式清酒煮蜆$38】啲蜆都幾大隻而且係新鮮嘅，湯嘅酒味適中，仲加咗少少紅辣椒粒，食落幾惹味。餐廳有普通枱同「自閉位」，雖然餐廳位置比較僻，但我哋食到兩點幾都不斷有客入座，睇嚟餐廳喺呢區都幾受歡迎。