Video
Read full review
2014-04-26
8620 views
晌小弟嘅飲食日誌裡邊，「死佬飯局」喺其中一個必不可少嘅飯局組合，顧名思義，就喺一班撇低老婆仔女嘅死佬，出嚟大食大喝嘅麻甩飯聚。一年梗會搞幾次，十幾人難次次人齊，所以有小飯局，亦有大飯局。以前成鬼日去長沙灣新星打鞭爐，話要衝出深水埗，殺入香港嘅「大西北」 ，講咗成年，卒之成事，多謝一眾好兄弟嘅支持，今回大飯局就揀嚟屯門三聖村嘅「興記」。未去興記，當然要先晌三聖村買海鮮。附近一列十多個海鮮檔，海鮮種類繁多，其中一個「死佬」孔Sir同啲判頭食開大茶飯，揀海鮮依啲工作當然難佢唔到，小弟都喺跟住尾去見識吓 。最後，晌關財記及發記唔覺唔覺買咗9樣海鮮，一共$2,900左右 ，下面自然逐一介紹。不過，個人最唔鐘意啲海鮮檔無標明價錢，下下都要問佢，雖然話嚟到食海鮮唔計較得咁多，但標明價嘅話，啲客睇啱咪買囉，又唔喺咩神秘嘢。揀好海鮮，就「嗱嗱淋」拎去興記代煮，興記收費好簡單，代煮海鮮油料費收$52斤，包晒洗切，點整都得。理論上佢會逐袋海鮮同你秤，所以，其實晌買海鮮時，應該問海鮮檔要單，方便對個重量數，以及等自己心理有數，油料費大概要俾幾多。此外，興記又會問埋你想點整，如無心水，佢都可以俾啲意見點整
未去興記，當然要先晌三聖村買海鮮。附近一列十多個海鮮檔，海鮮種類繁多，其中一個「死佬」孔Sir同啲判頭食開大茶飯，揀海鮮依啲工作當然難佢唔到，小弟都喺跟住尾去見識吓 。
最後，晌關財記及發記唔覺唔覺買咗9樣海鮮，一共$2,900左右 ，下面自然逐一介紹。不過，個人最唔鐘意啲海鮮檔無標明價錢，下下都要問佢，雖然話嚟到食海鮮唔計較得咁多，但標明價嘅話，啲客睇啱咪買囉，又唔喺咩神秘嘢。
揀好海鮮，就「嗱嗱淋」拎去興記代煮，興記收費好簡單，代煮海鮮油料費收$52斤，包晒洗切，點整都得。理論上佢會逐袋海鮮同你秤，所以，其實晌買海鮮時，應該問海鮮檔要單，方便對個重量數，以及等自己心理有數，油料費大概要俾幾多。此外，興記又會問埋你想點整，如無心水，佢都可以俾啲意見點整先好食，絕對唔使你太操心 。
興記自詡為海鮮燒臘飯店，所以，除來料加工代煮海鮮，又有馳名燒鵝及其他燒臘，數十款小菜，故此，今晚食海鮮以外，都預訂咗隻燒鵝，又額外加個扒芥菜膽及炒麵。除油料費，醬料每位收$10，星期六、日、公眾假期嘅晚市仲要收加一。結果，連埋汽水、啤酒，晌興記埋單喺$1,880，所以，夾埋成餐飯嘅消費約$4,800，除番10個人，每人$480左右。
順道講少少環境，有部份地方屬戶外，但搭晒帳篷有瓦遮頭唔使擔心，亦有部份地方屬室內，喺由六角亭間出嚟，裝修到同間酒樓無分別 。服務方面，OK啦，話好唔算好好，話差亦唔喺差。
講咗咁耐，都喺時候起筷，飲杯……馳名燒鵝 $100 / 例牌、$200 / 半隻、$400 / 一隻
燒鵝晌興記都算幾出名，為求穩陣實食到，預訂咗一隻，雖然隻鵝幾大隻，但面對我哋10個麻甩佬，真喺一隻都只喺勉強夠。燒鵝即燒，送上枱時仲感受到股熱氣，燒得色澤亮麗金黃，入口皮脆熱辣，油潤甘香，但個人覺得肉有點嚡，未能滿分。
象拔蚌刺身 買咗一條象拔蚌，我估都有兩斤重，按老闆介紹，可以兩食，蚌身可做刺身，而蚌膽用嚟白灼。刺身部份，切得好大塊，十分有睇頭，不過幾厚吓，入口唔夠爽，唯一就喺感受到一份海水嘅鹹鮮。
白灼象拔蚌膽 第一次食白灼象拔蚌膽，雖然個賣相唔多討好，部份位置烏烏黑黑，但味道唔錯喎，有啲似食豬潤，加埋椒絲、薑絲、芹菜，沾點豉油，又幾好食架 。
薑蔥炒肉蟹 肉蟹最大路都喺薑蔥炒好食，啲蟹買嘅時候仲生勾勾嘔緊泡，所以，啲蟹炒好出嚟，肉質新鮮，味道鮮甜，滿滿薑蔥香，食到要舐手指。「專燈」揀多件蟹鉗位，一流到爆 ！
椒鹽瀨尿蝦 瀨尿蝦非用椒鹽莫屬，啲瀨尿蝦雖至有手臂咁大咁粗，但體形都唔太輸蝕，厚肉爽口，炒得好惹味，椒辣味就夠嘞，鹹度再多少少就更理想。
砵酒焗美國桶蠔 買咗兩杯美國桶蠔，未煮嘅真物都幾大隻，煮完之後大縮水，真喺有疑惑喺咪我哋啲桶蠔，入口有點脆，明顯炸過，此外，砵酒味亦唔明顯，算喺今晚做得差嘅菜式。
辣酒煮花螺一買花螺，就想起辣酒煮，有少少慣性，其實花螺有唔少食法，如白灼花螺，紫蘇爆炒花螺，醬爆花螺，鹽焗花螺……等等。個花螺雖然喺辣酒煮，反而無個蟶子咁辣，但就確有酒香，肉質卻有少少韌，不過不失咁啦。
油鹽水浸蝴蝶螺 晌買海鮮時第一次見食款蝴蝶螺，好奇佢喺點，所以就買啲試吓，海鮮檔老闆介紹油鹽水浸，味道唔錯。下午墊有粉絲，又有啲冬菜，啲蝴蝶螺打開其實好似啲蜆咁，食落爽脆，味道鹹鮮，都真喺唔錯。
豉椒炒蟶子 買咗一紮蟶子皇，炒出嚟的確唔少，滿滿一大碟，而豉椒炒惹味十足，夠辣夠香，蟶子肥大，肉爽彈牙，超正，立時叫咗幾碗白飯分嚟撈汁撈蟶子食，好過魚翅撈飯，再俾多個讚 ！
果皮蒸大連鮑魚 跑到老遠嚟食海鮮，預咗豪番晚，一人一隻鮑魚無走雞。最佳做法，果皮蒸啦，大大隻鮑魚，煙韌中有份爽彈，少少果皮香吊起鮑魚鮮味 。
蒜蓉蒸扇貝 蒜蓉跟扇貝真喺天作之合，大量粉絲鋪晌扇貝之上，再加入大量蒜蓉，做法簡單直接，但味道就惹味鮮香，扇貝厚肉挺實，蒜香突出，連啲粉絲都特別香滑。
上湯扒芥菜膽 $68 食咁多道海鮮，一道上湯扒芥菜膽，清清哋，又健康，芥菜膽又做得爽脆入味，蒜子吸滿湯汁，亦都唔好錯過。
韮王豉油皇炒麵 $70死佬即喺死佬，點都要叫碟炒粉飯麵，雖然有干燒伊麵、瑤柱蛋白炒飯，但以豉油皇炒麵喺大家最想食。炒得夠乾身，又唔太油，不過，個人認為唔夠豉油香，兼且韮王落得好少 。
飽餐一頓，再揸車過元朗食B仔涼粉，咁先稱得上大食遊 。好難得，由讀書年代，出嚟打工，到結婚生仔，一班人後生時組隊一齊踢波，依家唔多走得郁就一齊睇波，飯局一坐低就有講有笑，晌whatsapp群組就更唔在講啦，日日短訊發來發去，講政治、講英超、講老細、講旅行……志在你知我未死，我知你仲食得走得，好不開心嘅一班人生死佬 。個飯局晌3月7日晚食，拖到今日先出，為嘅就喺將第800篇依個位置，獻給依班死佬們！
Post
