美中·鴨子 (Closed)

外國朋友來港，想帶佢食地道特色中菜，所以決定去美中鴨子。不過唔可以book位，只可以walk in，晚晚都好多人，等左差唔多成個幾鐘。。。食物方面，擔擔麵係我食過最好食，好香！而且只係$30，正常size唔係細碗，正正正。胡椒包都不錯。片皮鴨必嗌唔洗多講，不過麵皮偏厚，通常我會撕開一半，不然鴨未食晒，食皮都食到飽。鴨湯都好飲，雖然得兩粒豆腐。水煮魚同水煮牛都極推介，望落好似好辣但食落會有辣椒既香氣同小麻，絕對唔係食到咳或者火燒咀唇個種辣。本人唔食得太辣都接受到！水煮魚無骨而且大大塊，啖啖肉！水煮牛好滑好滑，完全唔會鞋！一碗份量都好大，而且係底會有小許麵條，十分抵食。兩個人食的話一個水煮魚/牛加半隻鴨基本上已經飽了。唯一失色既係個炒雞（見圖，唔記得咩名），味道同雞煲既雞一模一樣，無驚喜，雞肉亦不多，而且多骨，有小小失望。總括而言非常唔錯，性價比高！絕對要試！