炊豕店 (加路連山道) (Closed)

今日陪人去左港島一日遊，先去上環睇中醫，再落銅鑼灣apple store 同灣仔電腦城整電腦，搞完一大輪都接近晚飯時間七點幾，諗諗下食咩好果陣突然發覺之前上網睇過一間食豬扒好出名又性價比高嘅餐廳，就係炊豕屋啦!! 決定去試試佢🤤可能仲算早，未算太多人排隊，排左大約三個字左右就入到去了，入面地方雖然有少少狹窄，但係裝修其實幾有舊式日本野mix 香港嘅風味。我地叫左個招牌秘製豬扒飯配肉燥汁加太陽蛋，塊炸豬排厚切得黎唔會柴，做得出外脆內juicy 嘅口感，加埋煎得微焦嘅太陽蛋同埋肉燥汁十分送飯，唔洗十分鐘就清晒👍👍另外再叫左個話梅花雕豬手配撈粗麵加滑蛋，豬手醃得入味得黎keep 到口感膠質易咬，配埋嫩滑蛋同埋用左類似滷水汁調味嘅撈粗麵同樣十分惹味。 至於小食芝麻雞翼表現不過不失，尚算肉質嫩滑。飲品方面叫左樽裝蘋果汁同埋熱柚子蜜，為濃味食物refresh 一下。