黑木亭-お食事処 (玉成大廈) (Closed)

同朋友去元朗諗住試吓日本嘢，近近地見呢間環境唔錯就入咗去試吓。諗住食好少少所以叫咗個二人套餐。餐廳環境確實唔錯服務都幾好。仲有自助沙律吧，都有唔少選擇仲有日式前菜。餐廳環境十分乾淨，環境十分舒適，座位之間都唔會話太迫有足夠嘅空間。食物都有好多唔同嘅選擇，個套餐都包含咗好多唔同嘅主菜選擇。而且份量都十分足夠，同行嘅男性朋友食完都飽住走，絕對唔會話唔夠食嘅情況。個人覺得蕎麥麵都幾好，啱晒女仔，健康，又唔會話太油膩。雖然套餐嘅價錢作為午餐可能性價比相對上會爭咁啲，但係的確所有嘢都大大份，份量對得住個價錢。店員都好有心，臨走前問我哋嘅食物質素。如果去開元朗又想坐得舒服啲嘅話都建議大家去。最重要係，交通非常之方便出面就係小巴站。如果咁啱經過附近嘅小巴站，不妨去試吓呢間日本菜，保證你哋飽住走。相信出面呢個價錢嘅話應該唔會有一個份量咁足嘅日式套餐。