汐

Open Now

Now Closed

今日喺銅鑼灣行街，知道百樂中心多嘢食，所以諗住喺嗰度食午餐。樓下見到有人派傳單係一間新開日式丼飯專門店-汐，午飯時候50分鐘交枱，仲有七五折，價錢都唔算貴，決定試吓支持吓小店！餐廳環境好舒適，雖然唔算大，但有日式氛圍，仲可以坐日式榻榻米茶桌，係幾休閒嘅感覺。原條蒲燒鰻魚丼飯鰻魚好厚身好大條，非常肥美，入口淡淡魚油香。底下仲有煎得厚身嘅滑蛋，應該加了一些上湯一齊煎，所以帶有些少甜和鮮香。鰻魚加上勁多木魚碎，更增添口感。醬油漬角切三文魚配醬燒三文魚腩丼物賣相非常吸引，配料非常豐富。分別有角切三文魚，中華沙律，粟米粒，蟹籽，香葱等等。角切三文魚帶有些少醬油香，整個飯唔使加豉油都夠味，幾好食。燒三文魚腩經過炙燒，帶點香脆，魚油豐富，油脂喺嘴裏溶化，好香口。將所有材料混在一起有點像夏威夷poke bowl，好味！Sangaria提子汽水呢個牌子嘅汽水係唔錯的！餐廳都好貼心，上菜後先計時50分鐘交枱，所以唔會好趕急，對於上班人士來說，絕對有足夠時間享用。