煲底海鮮火鍋料理 (Closed)

好記得幫襯煲底嗰日係今年最凍嘅一日，凍到本來想食日式丼，最後都係忍唔住叫咗個煲仔麵暖暖身🥶。呢篇等到今日成三十度先出，真係一路寫一路都差啲滴汗🥵。呢個「煲底自選湯飯」可以揀主糧，湯底同三款配料，主糧五揀一，湯底四揀一，配料三個等級各揀一，好似好複雜，其實好簡單，我嘅選擇係：蘿蔔魚腐肥牛健康淮山麵配滋補藥膳湯。原先以為係有爐一路㷫住個煲一路上枱，原來我諗多咗😅，只不過係一碗熱辣辣嘅，比較大碗嘅車仔麵。不過，雖然如此，碗麵其實幾好食，其中最出色嘅係蘿蔔，又甜又腍，魚腐同肥牛就正常水準，湯底嘅藥膳味雖然唔係好濃，但係都幾甜幾好飲。由於煲底主打火鍋，所以有一系列調味料免費供應，包括我最鍾意嘅沙茶醬，芫茜，炸蒜粒同蒜蓉，呢個真心正😍。食完個麵，再飲哂啲湯，當堂成身暖笠笠🤗。