岳飛餐室 (Closed)

今日去左柯士甸路岳飛食LUNCH。呢間餐廳我都係第一次幫襯﹐同朋友行過見SET LUNCH 都唔貴﹐就入去試下。環境的確幾好﹐當時係12點45分左右﹐只得4~5成滿﹐我地兩位都有個闊落卡位可坐(呢個卡位坐四個肥佬都應該無問題)。服務都幾主動﹐亦算友善﹐呢方面無咩可以挑剔。我地兩位每人一SET LUNCH﹐朋友點了炸芝士沙律及牛扒七成熟﹐她的意見係兩者都做得很不錯。我就要了洋蔥湯及南瓜會羊肉。洋蔥湯同一般的並不相同﹐似係白湯一類﹐味道還可以﹐但我自己比較中意BAKED﹐有芝士鋪面的洋蔥湯。羊肉煮得夠淋亦好鮮﹐醬汁因為用南瓜煮所以帶甜味﹐幾開胃。切成小方塊的南瓜肉都好好味。另外仲叫左一個煎鵝肝﹐真係幾好味﹗略焦的外層包著甘香甜美的鵝肝﹐水準都幾高﹗呢客鵝肝午市賣$28 ﹐都算抵食。不過如果可以做得更加“軟”及“化”就好了。餐飲就點左熱咖啡﹐係一壺上的﹐都算幾香﹐而一壺的份量俾二人享用每人約有兩杯。埋單$200有找﹐以環境及食物水準計﹐岳飛的SET LUNCH都唔算貴。但據聞晚市就幾貴下﹐真係要有機會先去試了。