Beerliner German Bar & Restaurant (Closed)

午餐買一送一，哈根大師雪糕球任食，店方規定每人必須要叫一個餐。人多嚟食，鹹豬手係不二選，勝在大隻、皮脆、肉唔乾，非常惹味；香腸拼盤集齊四式風味，搭一件超厚「午餐肉」。密集式食咁多肉，好快滯，全靠拼盤的酸椰菜恢復胃口，可惜薯蓉欠薯味兼較乾，鍾意食 creamy 版多d。煙雞及櫻桃番茄脆薄餅，拎一塊上手，見證芝士絲係咁樣拉成。咬一啖，又脆又薄，餡料豐富，芝士味唔太濃，醬汁係 BBQ sauce，汁的份量剛好，鮮番茄放多 d 就好喇。早喺落咗單後，已急急腳去冰櫃揾哈根大師，有士多啤梨、雲尼拿同朱古力三隻味，留意返唔係供應雪糕杯，係要自己用雪糕勺潷雪糕。食過兩球，行去沙律枱攞菜，清埋主菜，再追加四球雪球。揾日試吓由十二點食到兩點半，可以食到幾多球呢？以前餐飲係咖啡或茶，而家改為肥仔水或果汁，菠蘿冰唔死甜，夠大杯。沙律由派餐變成自助形式，減少浪費，希望做埋凍飲走飲筒就更好。最抵讚係增加咗雪糕勺的數目，唔使大家排長龍呆等。