雅閑泰

Open Now

Now Closed

一講起錦田紅磚屋，我諗大家都清楚喺邊度啦。嗰度有間泰國嘢真係好多嘢食㗎。另外，仲可以挑戰味蕾，皆因廚師用咗泰式奶茶做茶膽，所以眼見涷檸茶非涷檸茶，啜落去係涷奶茶。媽吖，好奇怪吖！午餐款式勁多，味道唔錯，特別係炒飯及炒麵。份量大，用料夠，又入味。冬陰功有晒泰國風味，中意配飯配麵都冇問題，再加上有咁多款配料俾你揀，包唔會悶！不過泰國最知名嘅『海南雞』就一般般，食水唔靚，白雪雪。無辦法！好食嘅海南雞真係可遇不可求！炒飯做得好出色，配料多又入味！香葉辣肉碎煎蛋飯，肥肉少，略嫌肉碎炒得太乾！蠔仔煎蛋飯，粒粒蠔仔都好大粒下面呢個係香葉肉碎炒飯泰式金邊粉，呢啲基本嘢基本上唔會有出錯㗎喇，大家可以放心食！你睇下呢個泰式炒金邊粉幾多配料，店家真係一啲都唔孤寒！青咖哩一般般，就正正常常喇，即穩定。下面四款，分別喺船麵/海南雞湯河/冬陰功海南雞湯飯及冬陰功豬頸肉湯河。冬陰功真係好正，同事成日都叫呢個，再咁食法又重幾磅！最後講一講：香茅豬扒香茅雞翼就唔好叫啦，呢啲嘢係返越南餐廳食。呢度唔得㗎！飯後會送每人一件大菜糕，味道款式好多，有朱古力、西米、紅豆等等。