蜀客 (Closed)

之前係openrice見到蜀客精選套餐做半價就買黎試下，打電話預先book左星期六夜晚同女朋友去食。餐廳裝潢優雅，侍應服務態度良好，好快就上左前菜。蒜泥白肉幾滑，加埋啲醬汁辣辣地咁幾好食。鮮椒海鮮滙八爪魚爽口彈牙新鮮有口感。鮮椒黑木耳酸酸地好開胃！之後就上瑤柱海鮮豆花羹，材料好足，味道鮮甜。主菜酸菜桂魚，桂花魚鮮嫩無骨，無腥味，酸菜酸咸度適中，湯底少少辣，整體質素非常高！蔥爆鮮蝦球，蝦都幾大隻，爽口彈牙，加埋大蔥去爆炒好惹味。宮保雞丁，好多乾辣椒，雞同腰果都充滿辣椒香味！燴炒花椰菜，椰菜花爽脆唔會太淋，夠曬鑊氣。主食回鍋肉炒飯，唔會炒到好油，飯粒粒分明。甜品四川冰粉，食完辣的主食之後食冰涼的冰粉簡直透心涼，跟配料花生碎、葡萄乾味道非常夾！雖然每樣菜式的份量都唔多，但整體食完兩個人都已經夠曬飽，好評！下次有機會會就幫襯的。