胡爐 (Closed)

胡爐一直係我心目中打邊爐排名好高，呢次去係因為佢有做半放題，平時食開佢嘅人都知道佢係做開散叫，食物質素都係好高，同埋最主要係我想知半放題係點半法，其他餐廳做半放題我未必敢去，但呢間嘅話我信得過。餐牌上有三種煲揀，我地揀左青麻辣豬手煲，因為比較少見，同埋想食下麻辣野。係個煲未黎之前，我地食左個蠔皇鮑魚佛跳牆，其實係一個小燉樽裝住佛跳牆咁，但無諗到每樣食材都係入味，夠足料。同埋打邊爐點少得叫野飲呢。加38蚊就可以啤酒汽水任飲，重點係啤酒任飲，成件事好抵。呢個豬手煲係好有驚喜，豬手勁多，啲麻度同辣度可以話係賣飛佛呀，真係好癲，個豬手煲咁好食點搞，依家先係第一回合，後面仲有好多正野，不過我都一於少理，所謂有食唔食罪大惡極，有靚野緊係要食啦。食到咁上下，店員幫我地加湯，就開波打邊爐。第二回合係至尊拼盤，包括時令海鮮拼盤，胡爐牛拼盤（澳洲和牛，牛舌蕊，黑毛豬豚肉），手工丸餃拼盤（黑松露墨魚丸，手打蝦丸，芝心丸，泰皇鮮蝦雲吞，XO醬帶子餃，魚皮餃），其實清得哂成個至尊拼盤基本上係飽到不得了，已經勁滿足。食過呢個半放題就覺得呢個價錢真係出邊其他餐廳搵唔到，性價比高，食物高質，絕對唔會因為做左放題而揸流