養珍品牛肉麵 (Closed)

兩個月前某星期六，盛午旺時，往養珍品午膳。入門口有位四眼中年男士迎來，有禮貌地問：有冇訂位？聽罷頗愕然！事因眼尾已𥄫過，食客凋零，費解！引領坐下，頗有包廳食飯感覺，實在皇帝享受。白日夢未盡，中年男士殷勤奉上menu,後道：可以試下我地d牛肉麵，獨家宮庭秘方，精選牛肉，湯頭為十二個鐘頭熬成⋯（後刪三百字）未為所動，皆因親切又親近嘅四眼男士，隨口附送萬寶路香煙香味，兜口兜面。一轉神，心諗隔離街間X記牛腩粉D湯底肯定熬過年啦！再睇menu上D price 牛肉麵半份承為$111蚊未加一。嘩！正想班師回朝，但又心生不忿，橫掂嚟到，姑且一試。叫上牛肉麵半份、肉夾饃一份、豆漿一杯。食堂與廚房為一透明玻璃相隔，遠望一老嫗廚師慢工出細貨，半小時終奉上香噴噴三分一大碗貴精不貴多牛肉麵！細嚼肉鮮湯頭甘，水準之上，但麵條不值一提，應為超級巿場販賣之乾麵條煮成。正一鮮花插在牛糞上。肉夾饃隨之奉上，一啖咬下，弊！廚師一定調轉咗，比咗「冇夾肉」我！谷氣！滿口乾噌噌嘅夾饃麵粉，好彩有豆漿，一沖解困！今餐唔錯，半飽嘅滋味太好了，距離減肥目標又更進一步啦！