小富臨 (Closed)

天氣咁熱，室內活動最好，朋友帶我去新商場行街，南昌站A出口就到嘅V Walk，好多商舖同食肆，正！云云食肆之中揀左小富臨，好多人排隊，$6一位茶錢，抵丫，仲可以夜晚嘆到小菜同點心，中菜又啱食！ 五星拼盤一次可以食齊蝦餃、鳳眼餃、燒賣、小籠包、菜菌餃，小蒸籠特別精緻！ 我最鍾意鳳眼餃，翠綠色好靚，入面仲有蝦肉添。沙田燒乳鴿係富臨招牌菜之一，都算幾大隻，$29.8勁抵食！ 可以叫一隻先，食完覺得正再叫都唔遲，大量供應！薑茸松露鮮龍蝦 ，龍蝦開邊，啖啖肉，食得方便。 肉質鮮甜彈牙！ 但係薑茸同松露份量太多，搶左龍蝦鮮味，建議減量！花生苗紫金醬炒蟶子皇呢度菜都幾特別，花生苗唔係成日會食到，望落似巨型芽菜，但就多一份清甜味同少一份青澀味，加左紫金醬去炒又再多一分惹味。  不過蟶子皇只得四件，唔多夠喉。紅菜頭鹹魚雞粒炒飯係驚喜菜式，本來只係為飽肚，估唔到咁靚，賣相一流。 入口無乜紅菜頭味，但鹹魚咸香味就好香，再加上飯粒煙韌，食完一碗又一碗！