姨婆瑪麗 (Closed)

猴子唔係咁鍾意食雞皮，一來唔健康，二來煮得唔好仲會有啲腥味，不過姨婆瑪麗嘅雞脾，啲皮炸到卜卜脆，食起上嚟乾身唔油膩，真係忍唔住要連皮食。實不相瞞，今次嘅主角係雞脾，嗰碗麵餐只係陪襯。因為之前同事食過呢度嘅雞脾，猴子坐喺側邊聽到咬雞皮嘅清脆聲，忍唔住今次要自己親身試試。麵餐方面，猴子揀咗老鼠粉配怡保雞湯底。老鼠粉，即係銀針粉，短短粗粗、食落都真係幾「粉」，如果可以多返啲黏性，口感應該會好好多。餸菜方面，揀咗豬軟骨、豬紅同滷水雞蛋。豬軟骨嘅味道有啲淡，冇一般食開嗰啲咁濃味；豬紅結實滑溜，口感唔差；至於隻滷水雞蛋就毫無滷水味，同一般嘅水煮蛋冇乜分別。