Saravanaa Bhavan (Moved) New Location

響應Green Monday, 今日嚟個素食，不過係重口味少少嘅…印度餐。揀咗呢間位於尖沙咀亞士呢道嘅Saravanna Bhavan, 餐廳風格走大眾平民路線，食客又多係印度同鄉，感覺就好似入咗一間印度茶記一樣。打開餐牌一睇，林林總總多款印度菜式 ，唔單止分開南、北印度，仲有D加咗中國特色，好似印度客家炒飯同印度四川炒飯，相當有創意。唔好講咁多，一嚟叫個酥炸蘑菇同蔬菜咖喱角試吓先。咖喱角入面主餡料係薯仔，外脆內軟，配埋两款特色醬汁，啡色酸酸甜甜好惹味，綠色香草薄菏夠清香；無論口感同味道都相當不俗。呢碟酥炸蘑菇配咗個香濃咖喱汁，好味到食唔停口。一般人食印度餐多數揀印度薄餅，但我今次專登叫個洋葱烤包，一來平時比較少見，二來梗要試新口味喇！口感有D似北方燒餅，不過入面配咗新鮮嘅洋蔥同香草，可口清甜，今次真係冇揀咗。嚟多杯芒果拉昔，呢餐真係食得健康又滿足。讚！