夏雪 (Closed)

今日心情大靚, 同丫妹食完下午茶, 就去咗後街呢間甜品小店嘆dessert。餐廳內分上下兩層, 下層主要為二人檯, 環境簡約企理。呢度嘅甜品款式唔多, 主打窩夫, 即叫即焗, 另供應多款drinks選擇。我地揀咗兩款窩夫share, 每款窩夫擺盤都好靚, 細細份, 岩哂飯後甜品嘅份量。窩夫烘得外層微脆, 內裡鬆軟。皇家伯爵茶窩夫:細味窩夫有淡淡伯爵茶清香, 加咗少少自家製伯爵茶糖漿, 甜而不膩, 沾少少伯爵茶雪糕, 令伯爵茶香氣更加提升。配有兩件菠蘿, 面層有超薄焦糖脆, 香甜多汁。京都小山園抹茶咖央麻糬窩夫:外脆內軟窩夫中心間藏有麻糬, 窩夫有好淡嘅抹茶味, 相對令麻糬甜甜地帶黏質感。加咗少少咖央醬, 隱約有少少甜, 再沾埋抹茶雪糕入口, 令抹茶味更加突出, 配上好林、甜度剛好嘅紅豆, 配搭perfect match!Peach Smoothie:口感香滑, 有奶香之餘, 桃味亦很突出, 啖啖香桃味, 仲有幾片士多啤梨做襯托, 賣相同味道都好吸引。