素味謀麵 (Moved) New Location

一向係食肉獸，中環近排冇啖好食，威靈頓街翠華都執埋，Lunch恐慌性冇嘢食，咪周圍尋下寶咯。行咗去和安里，之前食過間越南河，原來變咗拉麵舖，仲係齋嘅拉麵，即係叉燒都冇塊，見佢乾乾淨淨，咪好又一餐唔好又一餐咯。兩個侍應姐姐斯斯文文，成間嘢個feel幾正，舒服。點咗蕃茄湯底、牛蒡丸、秋葵、餃，嘩，原來齋都好好味。牛蒡丸好好味，彈牙又香，唔會好似其他食素嗰啲有陣假肉、膠味，秋葵就正常水準啦，隻餃就犀利啦，一食就知舖頭自己包，啲菜味噴晒出嚟，好似成個田園食入口咁，新鮮有質感，清新舒𣈱。靈魂係個湯，蕃茄甘筍，唔會草青唔會澀唔會太甜。個麵雖細細，但都夠飽，唔使食咁多肉，爽呀。