金泰美食 (Closed)

尋晚同女友屋企人,佢媽咪、家姐及姐夫,去完尖東影冇乜特色燈飾,影幾張相就搵食。女友家姐提議去九龍城食泰國菜,我尖東搭1A巴士,兜餐懵先去到九龍城落車。因為我今次較多人數,而且個個為影相都著得靚少少,所以打算去新鋪食。先去舊鋪(金泰燒烤),我女友向鋪面燒串燒阿姐查詢,但果個阿姐竟然突現不悅之色,我女友再三查詢之下,佢先答我女友話轉角直行就係。我入到新鋪,點(生菜包、飛機炒飯、雞豬牛串燒、鹽燒烏頭魚、泰式金邊粉、冬蔭公湯、泰式麻辣鳳爪、椰青及珍多冰等等)。發覺菜較舊鋪細碟,賣相及味道都較舊鋪差,而且成間鋪只靠傳聞【如花】招呼,感覺服務方面較為缺乏,而且一入新鋪第一次見到【如花】,當堂都俾佢嚇一跳。我咁多個人個個都食得好飽,埋單價錢約三佰五十元,以咁多菜講都算抵食,但同舊鋪比較都係差好多,只係鋪面較光鮮及地方大好多,人多去呢間食就較寬敞。但我食完都一致認為,下次一定要去番舊鋪幫襯。事後我女友問番一個朋友,佢朋友都係呢度附近做串燒,佢話呢間新鋪其實同舊鋪唔同老闆,呢間新鋪只係掛佢名做,兩間並冇關係喎!?