素食一家 (Closed)

今日中午整班同事心血來潮話想食齋，響旺角都有好多唔同嘅齋鋪，但素食一家嘅正評比較多，所以我哋就決定去食啦。餐廳嘅裝修簡約，而且主要都係卡位，所以坐得比較舒服。每個人食齋都有佢嘅原因嘅，有啲人就想為環保出一分力，減少宰殺動物，有啲人就想食得健康啲，有啲人就想睇下點樣可以將素煮得好似真係肉一樣咁。所以我哋就叫左一個菠蘿咕嚕肉去睇下有幾似，再加一個鰻魚炒飯，椒鹽茶樹菇，同腰果百合炒淮山。菠蘿咕嚕肉咁賣相真係堅似真。咕嚕肉，咬落去嘅感覺就係食緊豬肉一樣，再配以山楂汁同埋菠蘿青椒呢啲配料，根本上冇辦法分別到佢係一碟素咕嚕肉。椒鹽茶樹菇就好香口，炸漿好脆好薄，茶樹菇嘅味道都好香，椒鹽亦非常惹味。腰果百合炒淮山的味道好清新，爽爽地，又可以中和一下其他重口味嘅餸菜，食完感覺好舒服喎鰻魚炒飯同喺日本餐廳食嘅味道係一樣，造型根本非常非常非常似鰻魚，食落口令你分辨唔出佢係一個素嘅炒飯。估唔到呢個餐廳走嘅路線都幾創新，唔會只係局限於中菜方面嘅素食。呢間餐廳除咗食物質素好之外，佢哋對於環保又不遺餘力。佢哋推出素食就係為咗減少屠殺動物，減低碳排放，為我地嘅地球作出一份力量。而且佢哋仲會將星期三嘅部份收益作慈善用途